☰
2026-10-23
Samstig
Am Samstigmorge simmer us unterschiedliche Richtige mitem Zug bis uf Schwanden gfahre. Nochere schnelle Begrüessig hemmer müesse inen vollgstopfte Bus iistige und bis uf Elm Station fahre. Mer sind nöd die einzige gsi, wo schöne Wetter gschmökt hend.
Vo döt us hemmer üs uf de Weg id Martinsmadhütte gmacht. Noch öpe drüehalbstund laufe und ere Mittagspause simmer uf de Hütte itroffe. Do hemmer als allertschs natürli müesse die feine Chüche und Fläde probiere, bevor mer no in Chlettergarte gange sind, wo gad nebet de Hütte isch. Zwüschet em Chlettergarte und de Hütte hets no e Zipline gha, wo gad au no het müesse testet werde.
Wieder zrugg ide Hütte hets au scho bald Znacht geh. Als Vorspies hets e feini Maiscremesuppe und en Salot, als Hauptgang Älplermagarone und zum Dessert no Caramelchöpfli. Nochem Znacht hemmer no üsi Rucksäck packt und hend denn no es paar Rundi Spieli gspielt.
Sunntig
Nochere me oder weniger erholsame Nacht isch am Suntigmorge am 5i tagwach gsi und öpe am halb 6si simmer im Halbdunkle losglofe id Richtig vom Iistig uf de Ostgrot. Nochere knappe Stund laufe simmer am Iistig acho. Mer hend kei Ziit für e Pause gha, will hinder üs nomol e JO au ufs Grötli het wölle. Drum isch di ersti Seilschaft mit de Saskia und de Laira gad vorusgspuret und alli andere hinedri. Währenddesse hemmer en schöne Sunneufgang chöne gnüsse und au scho bald e Schicht chöne abzüche und d'Sunnebrille füreneh. Es isch sehr es schös Grötli gsi, immer wieder mit es paar Chletterpassage dezwüschet. Mir hend a dem Tag e wunderbari Ussicht uf alli Berge rundume gha.
Amene flächere Plätzli ufwem Grötli hets no e churzes Päuseli geh, bevor mer denn au scho wieder wiiter chletteret sind. Denn isches nüme wiit gsi bis mer au scho bide Schlüsselstell vom Grot acho sind und alli sindere Meister worde. Churz vorem Mittag sind alli dobe acho - no nöd ganz ufem Gipfel uf, de hemmer denn no öpä 10 min müesse laufe. Ufem Gipfel hemmer üse z'Mittag usem Rucksack gesse und hend üs denn au scho wieder uf de Abstiig gmacht.
De Abstiig isch en blau-wiise Weg gsi wo nebet em Gletscherhorn abegange isch. Döt hets früener emol en Gleschter gha wo mitlerwiile aber gschmolze isch. Wider zrugg ide Hütte hets nomol e Chueche und Fladepause geh. Leider hemmer nöd viel Ziit gha zums lang gnüsse, will mer wieder uf de Bus hend müesse. Drum hets gheisse: Sachä zämepacke und no die letschte paar Höhemeter in Agriff neh. Denn isch eigentli de Plan gsi zum s'Bähnli neh zum üsne Bei en Gfalle mache, aber es hend so viel Lüt gwartet, dass mer denn mit abelaufe glich schneller gsi sind als s'Bähli.
Z'Elm une hemmer denn sogar no deziit gha zum es Glace esse und hends denn au no rechtiziitig ufe Bus gschafft. Z'Schwande hemmer üs denn wieder vonenand verabschiedet und scho sind zwei wunderschöni Täg ide Berge wieder verbii gsi.
Teilnehmendi: Saskia, Mischa, Laira, Livia, Fabian, Salome, Patrick, Lorena
