☰
2026-10-18
Samstig, 03.10.2026
Am Samstigmorge früe hemmer üs voller Vorfreud in Wil troffe. So isch üsi Reis mit em Zog noch Orgon gstartet. Z’Basel simmer uf de TGV umgstiege. Dötte sind den au die letschde vu üs dezuecho. Diä 5 Stündig Fahrt hämmer mit Tichu, Wizard, Werwölfle und andernä Spieli verbrocht. Bim Werwölfle hämmer ä Sondercharte namens Potzfrau ihgfühert. Sie hät mösse schreiä wämmer gstorbe isch. De Dominic het sich das sehr z’Herze gnoh und mit sim Schrei de andere Passagier en Schrecke iigjagt. Am Spöterenomittag simmer ufem Campingplatz acho und händ üses Lager ufbaut. Nochher hämmer de wiiti Weg zum Lade uf üs gnoh. Eso hämmer den alles chönne poste womer für äs feins Chilisincarne brucht händ. Zum Dessert hets Vanillepudding mit Erdbeeri gäh.
Sonntig, 04.10.2026
Nachem richhaltige z’Morge simmer ad Mur de six und Mur du quatre gho chlettere. Zerscht aber hemmer die neue Jöler i de Seilhandhabig und Chlettertechnik igführt. Ez wommer alli parat gsi sind isches ab ad Wand gange. Weg de strahlend heisse Sunne isch s’Tichu spielä aber bald im Vordergrund gstande. De Jeremias isch so frühe und motiviert goh Dessert choche, dass er sogar sini Chletterfinkä vergesse het. Üsi Spitzechöch (Laira, Chrispoh, Jeremias, Joris und Dominic) händ sehr feini Foccia i de Pfanne bachet. Als Hauptgang hets Hamburger gäh und zum Dessert hets ä hammermässigs Tiramisu ohni Eier und Amareto geh.
Mäntig, 05.10.2026
Au am Mäntig simmer vom Sunneschii gweckt worde. Mer sind nomel ad d’Mur de six und ein Sektor witer Links ad Breche Süd gho chlettere. Der Jeremias isch den au mol no uf sini abhandechone Finke ufmerksam gmacht worde. Mir hend gchletteret bis üs d’Sunne bröttlet hät wie Grilllwürscht. Drom simmer denn alli ad Breche Nord wos schöne Schattä gha hett. D’Chrüterhäxe Salome H. und Livia sind ufem Weg zu neue Routene, Chrüter und Tischdeko goh sammle. Als Abschluss hemmer us alli öbers grosse Loch bi de Breche süd Abgseilt. Die einte sind aschlüssend gad in Pool go Bade und di andere sind goh poste. D’Salome hät churzerhand s’Ichaufswäggeli mit uf de Zeltplatz gnoh, so isches den au chli ringer gsi mit em Transport. Als z’Nacht häts Gschwelti mit viel verschiedene Chäs us Frankriech und als Dessert Schoggimouss mit Rahm ghä.
Dienstag, 06.10.2026
Zum am heisse Wetter z’flüche sind die motivierte an Sektor Babylon goh würge, de isch ächli meh im Schatte gsi. S’erstmol hemmer unpollierti Route und Mehrseillängene gfunde. De zweiti Sektor, für die gadeso Motivierte, wo nöd hend wölle würge, isch derfür umso speckiger und drom eher unloned gsi. Deför het diä Gruppe no amene Freesolo Chletterer dörfe/chönne/müsse zueluege. Am spötere Nommitag sind die meiste wieder in Pool ghocket. A dem Obet hemmer üs uf de Rege am Mittwoch vorbereitet und ghofft, dass nöd die vorhergseite 180 mm chömed. Als z'Nacht hemmer üses Lieblingsmenü gmacht i de JO. Das wär als Hauptgang Älplermagronen und als Dessert Ovischoggi-Mascarpone Creme. Nochere sehr lange Tichu-Rundi simmer endlich goh schlofe.
Mittwoch, 07.10.2026
Scho ide Nacht het de starchi Rege agfange. Drum hemmer hüt gmüetlich usgschlofe und s’Dächele vom Rege uf de Zeltdächer gnosse. Oder wie de Christoph und Jeremias us Schlarpe än Damm baut händ im Zelt. Nocheme usdehnte Zmorge sind die meiste uf Avignon gange zum d’Stadt aluege. Diä andere händ de Tag mit Tichu spiele und Kaffi trinke verbrocht. Sie sind denn zwor glich no d’Chilä und Friedhöf vu Orgon go ahluege. D’Reis uf Avignon het scho spannend agfange. Will de Bus hett nöd det aghalte wos uf üsem Fahrplan gstande isch. So hettet mer de Bus fast verpasst, wenn diä netti Buschaufferin nöd aghalte und üs ufglade hetti. Ide Stadt Avignon hemmer üse Städtetrip mit Kaffi trinke und Glace esse verbrocht. I de Stadt hets en sehr alte, aber au idröckliche Bom gha, will mer nöd gwösst händ, was es isch. Händ öppis sGfühl gha sie mösset diä Frucht probiere - zum Glück is sie essbar gsi. D’Livia, de Jonas und de Linus händ sich als krönende Abschluss no bi stärchstem Rege freiwillig gmolde zum go poste. Da isch den aber au meh zunere Bachwanderig worde als en gmütliche Spaziergang. Lustige hemmers aber glich gha😊. Zum Znacht hets Tomate- und Pilzrisotto gäh. Als Dessert isch üs än Bananensplit serviert worde. Öber de ganzi Tag verteilt hämmer ä alti Herbstlager-Tradition wiitergführt und jede het es Bändeli öbercho.
Donnerstag, 08.10.2026
Au am Donnstigmorge isch alles no nass gsi, drum hemmer nomel usgschlofe, Tichu gspielt und Kaffi trunke. Nochem Zmittag simmer den endlich wiedermol goh chlettere . Dasmol am Pointe Sikamolle, do hets für alli sehr schöni Routene gha. Dank em starche Wind is aber chälter gsi als gester. Zum Znacht isch ä grossi Portion Spagehetti mit Tomatensauce und als Dessert än Coupe heisse Liebe gchochet worde.
Friitig, 09.10.2026
Am Friitig simmer nomel am Pionte Sikamolle und Petit Cirque gsi. De Petit Cirque hemmer aber zimli schnell wieder ufgeh. Döt hets eher Orkan-mässig gloftet. Willmer hüt de letschdi Chlettertag in Orgon gha hend, simmer nomel chli goh wörge. Glichziitig hämmer natürlich üsi Fähigkeite bim Tichu spielä vertüfft. Ä starchi Windböe het den aber s’Rote Siebni weggloftet, scho fast hemmer z’Suchaktion ufghe, do het sie d’Livia im Gebüsch gfunde. Als Abschluss simmer no is Restaurant goh Pizza esse. Leider het de Pizzaoffen nur für 3 Pizzas Platz gha. Mer sind üs vorcho wiä 10 Seilschafte i de gliche Route, diä erste sind scho fertig gsi wo si di letschte no nöd mol öbercho händ.
Samstig, 10.10.2026
So früe wie hüt simmer s’ganze Lager niä ufgstande. No fast im dunkle und no vorem z’Morge händ diä meiste s’Zelt abbroche. De z’Morge isch vorallem ä grosses Reste esseti mit griechischem Joghurt und Milch gsi. Uf de Heireis het de Joris im erste Zog ä Abdeckig vode Azeigetafle abegruft, mit Sackmesser händs diä aber wieder chöne ufe montiere. Im dritte Zog hät sich de Dominic vor luter Lache fast amene halbe Brot verschlockt. Und im vierte Zog het d’Anita de Abfallchöbel z’dynamisch ufgmacht und ebefalls gad demontiert. Aber sös simmer ohni Underbröch wieder in Wil acho.
Wie immer wieder eimol meh ä schös Herbstlager mit vielne loschtige Moment gsi.
Danke allne Leiter för da tolli Lager, und de Marlies und Laira förs Organisiere 😊.
Leitende: Marlies, Laira, Martina, Anita, Salome H., Christoph und Jeremias
Teilnehmende: Lorena, Silvia, Joris, Dominic, Jonas, Linus und Livia
Bericht: Livia, Martina und Jeremias
