☰
2025-12-09
Samstag
Bi strömendem Rege hemmer üs z Wattwil am Bahnhof troffä. Nachere Zugfahrt id Innerschwiiz, simmer miteme urchige Bähnli berguf gritte. Trotz 10% verluscht vo Teilnehmer und es paar Motivationslöcher hemmers durchnässt doch no id Hütte gschaft. Nochere Suppe und schö dekoriertem Salot hets ganz e feini Lasagne geh. Nocheme Roulade und etliche rundene Tichu hemmer üs den i üssi Better verchroche.
Sonntag
Nocheme gmüetliche Zmorge hemmers gwogt inen Chlettergarte zgo wo trotz Rege troche blibe isch. Wos den wider agfange het regne simmer wider id Hütte gflüchtet womer wider uf bessers Wetter gwartet hen. Mir hens den nomol gwogt zum go chlettere sin den aber scho bim Abseile in Chlettergarte veregnet worde. Noch dere erneute regetuschi hemmer üs den riesig ufe Znacht gfreut. D Chuchi het sich natürlich nid lumpe loh und es feins Voresse mit Polenta und Hörpfelstock zauberet. Noch sehr vielen rundene Tichu miteme Wechselbad vo emotione simmer au scho wider go pfuuse.
Montag
Hüt morge wäremer vo warme Sunnestrahle gweckt worde aber leider hets no ä Nebelwand dezwüsche ka.So simmer nocheme erholsame schlof gmüetlich go zmörgele und hen de Morge mit Tichu spiele und chli Usbildig verbrocht. Nochem zmittag sin es paar Jöler am Kibe entgege glaufe und hettne die schwäre Laste abgnoh. Somit wär au s Kibe mit durchnässte Schue uf de Kröntenhütte acho.
Am nommitag hemmer üs mit verschidene Spieli besser kenneglernt und hen de zNacht chumno chöne abwarte. Pünktlich am halbisibnie simmer mit Suppe/Salot und Nüdeli mit Schnitzel und Rahmsauce verwöhnt worde. Noch ganz viel Caramelchöpfli hets denn dJöler fast verjagt.
Dienstag
Mit grüsigem Wetter und viel Enthusiasmus ischs Kibe richtig Klettergarte Chuchibligg losgwatschlet. Obwohl de Chlettergarte scho in sicht gsi sich hets Kibe erscht nocheme buschige und nerveufribende Zuestig die nasse Route chöne in Agriff neh. Tapfer sisn den die tropfnasse Routene ufegschpuelet. De nommitag hens den mit verschidene Spieli und abseile i de Hütte verbrocht. Noch dem glungne Tag sins zfride und müed is Bett gschloffe. De Rege het au d Jo nöd ufghalte so sins am Morge ufgstande und hen die erschte Mehrseillängene in Agriff gno.De zmitag hemmer den aber i de warme Hütte gnose. Am nommitag sin den die einte nomol fescht entschlosse go Chlettere de rescht isch i de warme Hütte blibe und het verschideni Chnöpf güebt. Zum z`Nacht hets e feini Suppe und Salot geh. Als Hauptgang hens üs den verschideni Pizzas uftischet wo de Hammer gsi sin. Nochem z`Nacht hemmer no en verdauigsschwumm im See gmacht.
Mittwoch
Nocheme feine z`Morge isch sKibe serst mol go Mehrseillängene chlätere. Noch dene plattige aber schöne Routene hen sie ihre wohlverdiene Zmittag i de warme Hütte gesse, bevor sie den am Nommitag in Chlettergarte sin go chlettere. Leider sins den au schowider vom Rege underbroche worde und sin schwern Herzens zrug id Hütte.
Au d JO isch hüt fliesig am chlettere gsi. Voller tatendranf hemmer hüt s vordere Pauggenstöckli in agriff gno. Uf verschidene Routene hemmer üs ufe Weg richtig Gipfel gmacht. Voller vorfreud uf de Gipfelkaffi sin d Jöler die Felse durufgspuelet ases nurno groche het. Nochere wohlverdiente Mittagspasue mit Gipfelkaffi, simmer den no in Chlettergarte um de Tag uszklinge loh. Noch dem glungne Chlettertag hemmer üs riesig ufe z`Nacht gfreut. Nochere feine Suppe und Salot hets Riis Casimir geh und es feins stuck Chueche zum Dessert. Nochem z`Nacht hemmer üsi Rucksäck packt und d Hochtour für morn planet.
Donnerstag
Trotz äm Räge isch dJo hochmotiviert am morge am 5i ufgstande nocheme stärkende z`Morge hemmer üs ufe Weg richtig Krönten gmacht. Begleitet vum Regä und Nebel simmer nochere guete Stund scho zimlich durchnässt gsi. Nochere demokratische Abstimmig hemmer üs dezue etschide asmer lieber no es zweitsmol z`Morge essen und en schwumm im See machen als bi dem Wetter ufe Krönten z`laufe. Am verägnete Wetter zlieb simmer i de Hütte blibe, hen verschideni Chnöpf und Techniken güebt und uf bessers Wetter gwartet. Wie uf wunsch bstellt isch am nommitag sogar no d sunne fürecho. So hemmer üs voller tatendrang ufe Weg inen Chlettergarte gmacht und hen de nommitag mit Chlettere verbrocht. Pünktlich uf die halbi 7i simmer aber wider i de Hütte gsi den wer will scho de z`Nacht verpasse? Nochere feine Älplermagrone und eme frisch bachne Mandelgipfel het üs Hütteteam no künschtlerisch usegforderet, für üses 1. Augustbrötli hen alli döfe es Fähnli gstalte wos den i üses Augustbrötli gsteckt hen. Wider bi simmer Chräfte hemmer üs nomol ufe Weg in Chlettergarte gmacht. Döte isch bises dunkel worde isch viel glachet und kletteret worde. Zum de obig no gmüetlich z beende hemmer no es paar Rundene Tichu gspielt und sin den müed und zfride go schlofe.
Freitag
Wills nüme grägnet het isch es chlises grüpli vorem z`Morge zum nass werde no in See go bade. Nocheme feine z`Morge mit üsem 1. Augustbrötli, hemmer üsi Usrüstig zemmepackt und hen üs us de Hütte verabschidet. S Kibe het sich ufe abeweg gmacht und dJo het no die letschte Stunde usgnuzt zum Chlettere, bevor den au mir üs ufe abeweg gmacht hen. Bi de Bergstation simmer den wider zunenad gstosse und hen üs vo dem urchige Bähnli is Tal schofiere loh. Zum d wartezitz verchürze hets no en letschte Kaffi us de Bialetti geh. Mit zwei Büsli hemer üs den wider de weg dur schwiz is Toggeburg bahnt. Somit isches abwächsligsrichs und choge glats Summerlager scho wider verbi gsi.
Bericht: Lorena Roth
Leitende: Salome R., Salome H., Laira, Anita, Martina, Fabian
Teilnehmende: Flurina, Livia, Michael, Christine, Anna, Selina, Mia, Jan, Joris, Annika, Lorena, Michèle, Laurina
