× Login

Gruppen

Tourenprogramm

Clubhütte

Kletterwand

Wissenswertes

Finsteraarhorn 4274, grosses Wannenhorn 3906 und vorderes Galmihorn 3507 Skihochtour vom 26.-29.05.22,

2022-06-12

Früeh am Uffahrtsmorgä startet mer, us fascht allne Teile vo dä Ostschwiiz, üses Reisli richtig Grindelwald, ofs Jungfraujoch. Met Kafi und Gipfeli wörket mer am Suurstoffmangel entgegä und lönd dä ersti Höhächoller hinderüs. Ab gots of dä Schii dä Gletscher ab, zom Konkordiaplatz. D Fell werdet ufklebet und abmarsch über d Grüenhornlockä zor Finsteraahrhöttä zor verdienter Rösti und amänä dorstlöschende Wässerli. D Wärmi het üs einigi Schweisströpfli kostet!

 

Am Fritig heissts,  ab ofs Finsteraarhorn! Am 4i us dä Federä, zmörgelä und ab id Schuh. Schii bogglä bis zom erstä Schneefeld und wieter met dä Fell a dä Füess richtig Gipfel. Ofäm Hugisattel wert umgröst of Stiigisä und s letschti Stündli im perfektem Fels und Schnee, chroslet mer of dä Gipfel. Bi super Wetter und sehr agnehmä Temperaturä chömer dä Zmittag ofäm Gipfel gnüsse. D Abfahrt hämmer grad au no zom richtigä Ziitpunkt verwötsch. Mer het den zwor scho jedä Höhemeter gmerkt wo dä Schnee weicher wordä isch. Aber het super passt. Au das perfektä Tägli löhnt mer am früene Nomittag bi T-Shirt-Wetter of dä Terrassä langsam usklingä. Öppä äs «Wangärouge» hets denn scho geh!

 

Samstig! Wieder am 4i usä.  … Mer händ üs scho as früeh Ufstoh gwönnt…S glich Ritual, wiä am Tag voranä!  Hüt isch s Gross Wannähorn of dä andere Talsiitä s Ziel. A dem sini Gletschwelt het üs am letschtä Tag scho beeidrockt und mer händ än spannende Ufstieg vor üs. Z Denkä macht üs dä wenig Schnee wo um diä Johresziit liit. D Schneebroggä sind nümä so dick und dä Weg nöd immer ganz eifach z findä. Of dä Gipfel chömer hüt nöd. Dä Loft het asä quer blosä das sogar s losä Seil nümä ghanget isch und mer grad no nöd of allnä vierä krochä sind. D Abfahrt hämmer au wieder super verwötscht und händ ä recht gmüetlichi Zrockwanderig zor Höttä gha. Dä Nomittag isch natürli wieder total sunnäverwöhnt of dä Terrasse vertriebä wordä.

 

S letschmol am 4i usä, ab ofs Galmihorn und is Wallis of Reckingä abä. Nomol än Tag met prächtigem Sunneschii und idröcklicher Gletscherwelt. Dä Nebel het sich den aber glich nochli müessä zeigä. Äs ganz unschinbars Galmihorn met änärä langä Abfahrt in Summer. Ganz abä het dä Schnee denn nümä glanget und s letschtä Stündli träget mer üsi Schii is Tal. Äs beeidrockt immer wieder: vom tüüfe Winter in Summer fahrä. Mega schöö. Obwohl ganz so tüüf isch dä Winter nümä gsi. Äs het recht wenig Schnee för diä Johresziit.

 

Mer händ tolli Uffahrtstäg gha met bestä Verhältnis, super organisiert und kompetent gfüert. Dankä Bruno förs organisiere und umsichtig Planig vom Tüürli. Bis zor nöchschtä Uffahrt!

 

Däbi gsi sind: Nadja Hartmann, Christoph Gerber, Fabian Gerber, Marco Zweifel, Daniel Wildermuth, Patrick Schrepfer, Daniela Weber und Anita Gehrig

 

Gfüert het:  dä Bruno Bösch www.steinmannli.ch

 

Fotogalerie: