☰
2018-10-14
Herbstlager JO Finale Ligure (6. bis 13. Okt. 2018)
Samstag, 06. Oktober 2018
Mit verschidnige Büs sind mier uf Finale gchachlet. Obwohl mer de Brugge um Genua niid traue cha, hend mier üses Ziel sicher erreicht. Am Halbi 2i hett sich die ganz Truppe besammlet. De Plan wäri gsi, dass mier noh go chlettere gönd, leider hetts ahfange regne. Also hend mier üsi Zelter ufgstellt und sind noh chli durs Dorf gloffe. Nachem Znacht hend mier paar Rundene Werwölfle gspielt und de Obet gnosse.
Sonntag, 07. Oktober 2018
Hüt hend mier üs am 8ti besammlet, um zum gliche Chlettergarte vu geschter, Avancorpo di Boragni, zfahre. Es isch denn aber leider glich halbi 9ni worde. Dött ahcho hend mier üs denn in en hufe Seilschafte ufteilt. Es hett für Jedi und Jede öppis gha. Vu Riss bis Platte, vu eifach bis schwierig, aber vor allem hetts überall Löcher im Fels gha. Am Nomitag hetts denn wieder eh chli gregnet. Die ganz Krasse sind aber glich noh blibe. Am Obet simmer go poschte, bade und ad Bar. Zitlig sind mier hai, sodass mier noh chli Werwölfle hend chönne.
Montag, 08. Oktober 2018
Wieder hend mier üs am 8ti troffe und sind zu de Felse vo Borgo gange. Mier hend üs bi dene sunnige Felse ih eh gueti und eh besseri Gruppe ufteilt. Di Guete sind gho Mehrseillängene chlettere. Die hend dötte zoberst obe eh Jesusstatue gfunde. De Bruno hetts sogar fascht gschafft zum eh 7c vorzstiege. Di Bessere sind au go Mehrseillängene chlettere. Bi ihne isches chli durchwachse gsi. Es isch meh echli eh Dschungelexpedition gsi, als Chlettere. Spöter sind si noh in en Chlettergarte, wo am gliche Felse gsi isch. De Chlettergarte isch wie en chline Mini Grand Canyon gsi. Au de Obet sind mier wieder go bade und ad Bar.
Dienstag, 09. Oktober 2018
Wie erwartet sind mier hüt wieder go Chlettere. Rocca di perti hett d Felswand gheisse. Wieder hend mier üs in zwei Gruppe ufteilt. Eini isch inen Chlettergarte ihres Limit go sueche und die andere sind gho Mehrseillängene chlettere. Bi dene isches wieder eher chrutig gsi. Si hend zwor ih einere Seillängi es Eifingerloch, es Einarmloch und es Einmannloch gfunde. Am Nomitag sind denn au sie in Chlettergarte go s Limit sueche. Bi de andere im Chlettergarte hend am Morge sehr schöni Seillängene gha. Am Schluss sind alli wie toti Flüge umegläge, wills eso heiss gsi isch. Es paar, wohrschindlich mit Eidechse verwandti, hend noh Routene gchletteret. Au a dem Obet simmer gho bade und ad Bar.
Mittwoch, 10. Oktober 2018
Schön ischs Wetter hüt morge gsi. Mier sind dasmol as Meer go chlettere. Ei Gruppe hett wenigi Meter überem Meer eh Traverse gmacht. Es isch eh sehr schöni Traverse gsi, mit griffigem Fels. Di ander Gruppe hett ebefalls wenigi Meter überem Meer gchletteret. Es paar hend sogar dötta chönne bouldere und sich gad is Meer keihe loh. Am Nomitag sind denn di meischte an Strand gho sünnele und gho bade. Allerdings hetts es paar Wildsaue gha wo nomol sind go Chlettere. Ir Nacht isch den es würggli heftigs Gwitter cho.
Donnerstag, 11. Oktober 2018
Hüt morge sind vieli usm Zelt gschwumme. Dannoch hend mier d Folge vum Gwitter usgwerted. Vieli Zelter hend ghebt, aber einigi hends Pech gha, dass ihres Zelt imene Gunte oder Bach gstande isch. Wodurch si glich nass worde sind. Leider hetts aunoh Pechvögel gha, bi dene s Zelt nid dicht gsi isch. Also hend mier mol probiert, alles is Trochne ztueh. De Morge hemmer denn bimene Jass ir Campingbar verbrocht. Am Nomitag sind denn es paar im Rege is archäologische Museum glofe. Doch leider hetts zue gha. Si sind den hald go shoppe und eh heissi Schoggi go trinke. Di ander Gruppe isch ufm Camping blibe und hett en Spielenomitag gmacht. Am Obet hetts den nomol glich gregnet. Mier hend denn im Restaurant vum Camping zNacht dörfe esse, gsponseret vum SAC. Ah dere Stell nomol es herzlichs Dankeschön! De Fabian isch zwor recht verwirrt gsi, will es hett Pizza und Pasta kunterbunt vermischt geh.
Freitag, 12. Oktober 2018
Au hüt hend mier üs in zwei Gruppe ufteilt. Eini isch is gliche Gebiet wie am Zischtig es paar sehr schöni Mehrseillängene go chlettere. Dött hett d JO chönne zeige, was sie hend chönne. Alli andere sind ar Wand gegeüber ebefalls go Mehrseillängene chlettere. Sie hend sogär Geissböck und Gizi gseh. Di andere hend au viel Geisse gseh. Am Obet hend denn vieli ihres Gepäck bereits zemmepackt. Es hett aber noh drü JOler geh, Fabian, Gian-Luca und Jeremias, wo verusse unter freiem Sternehimmel gschlofe hend.
Samstag, 13. Oktober 2018
Zum Schluss sind mier wieder alli in gliche Chlettergarte wie am Mäntig go würge. Einigi hend ihri persönliche Bestleischtige ufgstgellt. Pünktlich am 12i simmer abgfahre. Ufm San Bernardino isch denn ah eim Bus noh de Diesel usgange. Mit viel Gschick und Geduld hend si en denn wieder zum Laufe brocht. Vorallem dur am Mischa sini Hilf, will er zwei Mol go Diesel hole isch. Es isch eh sehr schöns und lohnenswerts Herbschtlager gsi, wo wieder sehr guet organisiert gsi isch.
Mitcho isch als Leiter: D’Meral, Gregor, Christoph, Stephan Hobi, Martin Sieber, Marc, Mischa, Guido, Silvan und Dr. Geo. Stephan
Vur JO: Kaja, Norina, Marlies, Julia, Selina, Reto, Tom, Gian-Luca, Bruno, Fabian, Jeremias
Als Gäscht sind noh debi gsi: Marlen, Salome, Selia, Silvana, Irene, Viola, Tobias und Benjamin
(Bericht von Jeremias Eggenberger)
