☰
2016-10-15
Herbstlager 2016 im Tessin
8. bis 15. Oktober 2016
Tagebuch von Jeremias Eggenberger
Samstag Hüt ischs loas ganga. Ab ins Tessin go chlettera. Vieli griffigi Platta und stumpfi Riss hets ka, anart alles. Und schöä is gsi. Marroni hetts natürli o ka, und di sebe henmer o gsammlet. Zmittag hets halt nur für dia gi wonen drbi ka hen. Den simmer no chli mea go chlettara. Am Obet bim Zeltplatz hemmer den kochet. Bi üs hets Älplermagruna mit Marroni gi. Nacher het d`Meral eini uf Coiffeur gmacht.
Sonntag Mir sind achli gu chlettera. Wo mir denn i die erscht Wand igschtiga sin, ischs chu gu reggna. Dä Gido und i sind als einzigi witterkletteret. Dur Gebüsch und Gräss hemmer üs de Wäg ui banet. Wo mir denn ai chu sind, het Chefin gseit: „Mir gun is Sportzentrum vo Tenero, döt hets e überdachti Chletterwand.“ Jo steil ischsi gsi und o streng. Wo mir den wider zrug chu sin, hemmer afanga chocha. Teigaffa mit Marroni hets gi. Dr Obet hemmer mitem Spiel „Werfölflä“ verbrocht. Saggramet, isch das Spiel spannend gsi!! Ich ha nid chöna ruhig hogga.
Montag Gedanken zum Wetter: „d`Sunna schint, dr Himmel isch blau; jo sisch wahrlich schöa“. Jo es isch schöa gsi zum chlettera. Gu poschte simmer o no. Zum Znacht hemmer Racclet gmacht.
Dienstag Gedanken zum Wetter: „Wenns oba seicht und una schiffet, gun mir is Hallabad!“ Jo es isch wahrlich numma schöa gsi im Zelt. Aber d`Cheffin het is Hallebad wella, zum Glück! Wo mir düt acho sind, hets zwor numa gregnet, aber das isch jo egal. Sbescht isch dSauna gsi. Di seb hett ma scho bald als Konferenzrum chönna bruche für die nöchst HV. Noch emena derga Tag sin mir alli bis hinder dOara suber gsi.
Mittwoch Gedanken zum Wetter: „d`Sunna isch geel, dr Himmel blau, mir sin schlau und gun gu chlettera“. Am Morga bi i zwor no wi än Hörpfelsagg kleteret, am Nomitag aber bin i döt denn scho fascht ui gloufa. Jo es isch herrlich gsi zum chettera. Zum Znacht simmer gu Pizza essa. Mmmhh, das isch no guet gsi. Am Obet hemmer ötschis ganz briliants gspielt: es het sich „Gämsch“ gnennt. Himmel nohamol, hemmer mir en Spass ka.
Donnerstag Hüt isch leider das Lager scho zEnd ganga. Es het gregnet. Den simmer halt heiganga. Es isch a schöni Wucha gsi.
