☰
2015-07-27
Aus dem Tagebuch eines JO-lers – Sommerlagerbericht
JO Lager: 25. - 31. Juli 2015 KiBe Lager: 27. - 31. Juli 2015
Tag 1: (Beginn JO-Lager) Sali zäma, mir sind am Samstig (25.7.15) vo Wildhus über dä Mutschesattel uf’d Roslenalp. Döt hets vieli überschwemmti Munggälöcher ka.
Tag 2: Sali zäma, am Sunntig (26.7.15) sind dä Lukas, Marco, Richi, Samuel und ich uf dä föüfti Chrüzberg via d’Spiralä. Döt obä sind mir ca. 2h am Pläuschlä gsi. Nachärä sind mir über a so än komischä Grot zu dä Löcher im sechstä Chrüzberg abgseilt. Döt hend mir ä Kakrundi gmacht. Nachdem mir alli gschissä hend, sind mir ä angeblichi 4b kletteret. (Ich und dä Marco würdet si als 5b-5c+ deklariärä). Nach derä Seillängi isch no eini cho. Handschlag und a Erklärig zum Abseilä und denn seilid mir ab – laufed zur Hüttä zrugg und frässed no ä Rundi und gjasset wird au no. Nachärä bini go pennä.
Tag 3: Sali zäma, am Mäntig (27.7.15) hets gwindet wia än Sausiäch. Mir sind uf dä Zwinglipass und nachärä idi däzuäghörig Hüttä go jassä und Teetime mache. Nachärä sind mir dä Rosläfirstkiosk go plündärä und jetzt bini do und schrib das Zeugs. Nachärä (wenni fertig bi mit schribä) laufet mir zur Hundsteihütte und setzed das Lager fort. Wenn ihr däsäb Hanäpfupf wend läsä, gönd id Hundsteihüttä.
Der Schreiber Jeremias
Tag 4: (Beginn KiBe-Lager) Sali zämä, heute Dsischtig (28.7.15) brach der erste Tag des Kletterlagers in der Hundsteinhütte an. Zuvor sind mir ir Roslenalp gsi, genau drü Täg, wemer gnau muss sie. Säb chönd ihr aber dötä lesä. Mir hend üs ufteilt, Kibelär sind inen Klettergartä gangä verzellt d’Regula: „s’isch recht windig gsi. Zwei, wo s’ersti Mol am Fels sind gsi, sind uigspuälät, dasses nuno g‘rochä hät, und am Schluss hets schwarzi Streifä geh. Dr Bruno het am Marco (Leiter) erklärt, dassmär nur uilaufä muss, wenn’s nünt meh hät zum Hebe.“ Ich, sprich d’JOler, sind go Mehrseillängänä Kletterä. Dr Hansueli, d’Marlies und ich sind inärä Seilschaft gsi. Mir sind zwä Routänä kletterät. Di erst isch 4 Seillängänä gsi, mänti und als 5a deklariert gsi. Sie ischt ä schöni gsi. Di zwät isch als 4b deklariert und drei Seillängänä lang gsi. Aber, jetzt – jetzt chunt das grossi ABER: mir hend üs denn miterä anderä Seilschaft, am grosse Fabian, Louis und dä Debby, zämatuä und sind nomel drü Seillängänä bis ufä Gipfel kletterät. Die ganzi Gschicht (Seilschaft) han ich agfüärt! Nachärä sind mir älä abgseilt. Zrogg ir Hüttä heds Znacht geh. Weder d’Ärbsäsuppä, no s’Risotto no dr Dessert hät eim nid passt. Nachärä han ich das gschribä, also weiss ich nid, was am Obet no passiert isch. Morn gots denn witär.
Der Schreiber Jeremias
Tag 5: Sali zämä, hüt, Mittwoch (29.7.15,) hets gschiffät und gstürmt. Bi so Wetter sind mir nid go kletterä. Mir heted chönä ufä Hundstei go (was nu JOler hetted mache chönna) oder id Zwinglipasshüttä und nochärä inä Höhli. Mir alli sind id Höhli. Zeärst sind mir vo do us vorem Fählesee rechts hinterä id Zwinglipasshüttä gwanderät. Döt hend mir g’jasset, gessä und trunkä. Nacher sind mir fast verflogä wägäm Wind. I bi trochä blibä, aber nid alli. Ir Höhli isches dunkel gsi, aber mir hend jo d’Stirnlampänä gha. Nur blöd, wennsi nid tua het. Jo, mier chunt für hüt nünt meh in Sinn, chami nid richtig konzentrierä. Was es no git, isch: „Dä Znacht isch guät gsi!“
Der Schreiber Jeremias
Tag 6: Sali zämä, hüt, Donnstig (30.7.15), isch ei Gruppä ufä Hundstei, das heisst d’JOler und di ander (d’KiBeler) ufä Fähnligipfel. I bin zwor JOler, aber glich ufdä Fähnligipfel. Mir sind am viertel vor 9i losgloffä. Womer denn am Fuäss vom Fähnligipfel gsi sin, isch chalt und neblig gsi. Nid besser isches dädur worde, dassmer asä lang dr Istig vor eusärä Routä, dr altä Südverschnidig, nid gfundä händ. Dobä sind mir denn noch 8 Seillängänä gsi, langi Gipfelussicht hend mir aber nid ka, mir heted nämli söle am halb 7i zum Znacht zrugg si, s’isch denn aber viertel vor 9i worde. D’Hundsteigruppä isch aber au nid schneller gsi. Dä Znacht isch s’best gsi vo allnä drü Täg.
Der Schreiber Jeremias
Tag 7: Sali zämä, hüt gots heizuä.
Der Schreiber Jeremias
