KiBe/JO Sommerlager

30.Juli.2016 00:00:00

KiBe/JO Sommerlager 2016 Kröntenhütte

30. Juli bis 5. August 2016


Samstag

Neiswenn früä am Morge sind mir mit em Zug vo Wattwil nach Erstfeld greist. Am Bahnhof in Erstfeld sind mir den mit äm Alpetaxi zum Bodebärg gfahre. Vo döt isch dä Wanderweg steinig und steil id Kröntenhütte gangä. Äs isch heiss gsi. Am Nomitag simmer den scho serscht mol go chlätterä.
Sehr guet hemmer gspiesä i de Kröntenhütte; Gersten- und Gmüsesuppe als Vorspies, Polenta und Hörpfelstock mit zartem Brotä als Hauptspies, Erdbeerschnittä als Dessert.

Sonntag

Am Sunntig hemmer sehr viel gmacht; am Morgä simmer go Chlettera bis es gregnet het. Am Nomittag isch Monopoly gschpielt wordä bis zum Abwinke. Am schpötere Nomittag sind mir mit äm Hüttäteam  uf d`r Oberseemadli gwanderet.
Sehr guet hemmer wieder gspiesä; Knoblisuppe als Vorspies, Ebly mit Chäs überbache und Brotä als Hauptspies, und s`vorzüglichä Dessert isch wissi Schoggicreme mit Schoggimereng gsi. 

Montag

Mir hend uspent . Vor am Mittag hemmer Chartakund gmacht. Denn am Nommitag ischs Wetter besser worde und mir sind go chlättera. Am Obet hets äs erscht Augustfäscht ge mit Fürwerch natürlich.
Sehr guet hemmer gspiesä; Gmüsesuppe als Vorspies, den hemmer ä Brotwurscht prötlät.

Dienstag

Am Zischtig hemmer ä Merseillängi am vordere Paugenstok gmacht. Bir erstä Seillängi sind Bedingigä bitter gsi. Aber äs isch ä schöni Routä gsi.
Sehr guet hemmer gspiesä; Gmüsesuppe als Vorspies, Wildries mit Pouletrahmschnitzel als Hauptspies und zum Dessert Fruchtsalot.

Mittwoch

Hüt hemmer ä Hochtour gmacht, s`Ziel isch dä Kröntä gsii. Früä am morgä sid mir zum Gletscher ufgschtigä, vu dem us mir üs denn dä Wäg uf dr`Kröntä banet hend. Döt obä hemmer än Krönbock gse.
Sehr guet hemmer gspiesä; Sup spezial als Vorspies, verschideni Teigaffa als Hauptspies. Und 3 Mol Garamelchöpfli als Dessert.
Nachem zNacht hemmer no ä Poolparty gmacht. Sau glatt gsi. 

Donnerstag

Uf dä hinter Paugenstock gits a Route namens via Gisela. Rotend ämol was mir hüt gmacht hen, richtig: d`via Gisela. Mir hend drü Seilschaftä bildet. Ich bi mit äm Linus ihr Seilschaft gsi. Am Obet  simmer no in Obersee go bada, isch affachalt gsi.
Sehr guet hemmer gspiesä; Zwibel-Maissuppä als Vorspies, diversi Pizzas als Hauptgang und Glasse mit Niidlä als Desser.

Freitag

Am Morgä hemmer no Spieli gmacht und sind denn wieder richtig Heimat gangä. Mir sind glücklich und erschöpft dahei acho.
Es isch es genials Summerlager gsi. Es hett mir sehr guet gfalla.

 

Teilnehmer: Joel, Fabian B., Sarah, Livia, Bruno, Fabian L., Tanisha, Jan, Manuel, Jeremias, Julia, Mischa, Gianluca, Linus, Louis, Seraina, Roger, Irene, Stephan W., Samuel, Marco, Gregor, Christoph, Stephan H., Donat

Bericht: Jeremias Eggenberger

Tags:
Website by 100pro.ch