JO/KiBe Sommerlager

27.August.2018 21:10:00

Sommerlager 2018 Albigna Hütte

Mitcho ih das Lager sind:

Als Leiter: Samuel, Lukas, Marc, Mischa, Gregor und d’Anita
Ir JO: De Fabian Breitschmid, Bruno, Gianluca, Fabian Länzlinger, Katja, Tanisha, Louis, Roger und Jeremias
Im KiBe: Sarah, Livia, Levin, Joel, Mara, Silas, Fabian Schmid, Manuel und Jonas

Samstag

S isch noh Morgeh gsi, wo mier üs alli im Landquart troffe hend. Langsam hett sich de Zug dur d Bündner Berge gschlänglet. Z St. Moritz sind mier is Poschtauto gstiege, und denn meist stehend uf Pranzeira gfahre. S Bähnli hett PS denn zum Staudamm Albigna brocht. Vu dött us sinds denn noh Drü Viertel Stund gsi, bis zur Hütte. Leider hetts denn ahgfange regne. Drum sind mier zerscht chli ih de Hütte gsi. Wos denn nümme gregnet hett, sind mier denn noh chli gho Chnöpf und s Gehen am verkürzten Seil gho üebe.  Ahschlüssend hend mier denn noh de Obet loh usklinge. Natürlich hett üs au noh d Chuchi beglückt. Geh hetts zur Vorspiis: Rotchrutsuppe mit Salot. Als Hauptgang: Riis und Gschnätzlets anere Pilzrahmsauce und Broccoli. Als Dessert: Blechchueche mit Kokosstreusel.  Die beide männliche JO Mitglieder mittlerem Alter hend bsunders Freud ah de hüpsche Bedienig gha. 

Sonntag

Morgens um Vier wurde die JO Toggenburg von deren Leiterschaft erschüttert. Zerscht simmer nämlich gad uf eh rechti Hochtour gange. Am 4.45 Uhr simmer denn los marschiert. Mier hend müesse duur Gröllfelder chrabble, über Brugge laufe, und vu Fels zu Fels springe. Bis mier am Gletscher gsi sind. Dött hend mier üs denn ih vier Seilschafte ufteilt. Zwei Schnelli und zwei noh Schnelleri. Dii Schnellere hend denn sölle uf zwei Gipfel. Das sinds denn aber nid, will sie de richtig Weg niid gfunde hend. Also sind alli gliich krass gsi. Wo mier üs den ufem Gipfel vum Cima di Castello (3'379 M.ü.M.) troffe hend, hends mier üs dött obeh gmüechtlich gmacht. Ahschlüssend hend sich denn die Seilschafte trennt uf de Abehweg gmacht. De hett sich denn doch noh recht zogeh. Mier sind denn noh uf di glorriich Idee cho, imene Gletscherbach gho bade - es isch arschchalt gsi. Nochere sind mier uf eh Felsplatte gläge und hend üs en Sunnebrand beschafft. Am 16.45 Uhr sind mier denn id Hütte zruggkehrt. D Chuchi hett üs niid nur duurs Usgseh beglückt, sonder au wieder durs Esse. Als Vorspiis: Öpfel-Sellerie-Suppe mit Salot. Als Hauptgang: Süüdwurscht und Chääshörnli. Als Dessert: Vanillecrême mit Rhabarbersauce. Dannoch simmer gho schlofa. 

Montag

Am Morgeh am 6.00 Uhr simmer uf. Nachem z’Morge hend mier üs wieder in zwei Gruppe ufteilt. Ei Gruppe hett sich uf de Piz Balzet (2'869 M.ü.M.) gwogt. Dött isch de Lukas, Roger, Fabian, Katja und Jeremias mit. Es isch eh 13,5 Seillänge langi Tour gsi. De Roger meint dezue: „Schöööööööhhh“. De Jeremias hett trotz enere Schneeblendi die 10 stündige Tour  gmeisteret und meint dezueh: „Sehr schöööööööhhh“. Die ander Gruppe isch ar Spazza Caldeira, eh Mehrseillängegebiet, gho chlettere. Am Mittag isch denn au s’KiBe zu dere Gruppe gstosse. Sie hend denn nochhere glich under de Hütte Top Rope chletteret.  Si sind denn ebefalls noch 10 Stund id Hütte zruggkehrt. Dött hett s KiBe denn s Zimmer bezoge. Au hüt hetts wieder öppis Z’Esse geh: Als Vorspiis: Wirzsuppe mit Salot. Als Hauptgang: Risotto mit Brote. Als 2. Hauptgang. Song Contest mitere SAC Gruppe usem Tessin. Ahfang Tessin: Ötisch unbekannts. Denn Toggeburg: Oh mia bella. Konter Tessin: Bella Ciao. Als Dessert: Stracciatella Crême. Bella Ciao isch üs denn di ganz Wuche noh nohglofe. Und als Letschts isch noh en lang ersehnte Traum vu zwei JO Männer in Erfüllig gange: Sie hend dörfe gho abwäsche. 

Dienstag

Au hüt hend mier üs wieder ih zwei Gruppe ufteilt. Eini isch am 6.00 Uhr ufgstande und hett eini vu de länschte Mehrseilläng Route vu allne Plaisir gmacht. Gschlagni 22 Seillängene isch de Punta dal Albigna  (2'825 M.ü.M.) lang. Knappi 12 Stund hend dötta die drü Seilschaft brucht. De Bruno meint dezueh: „Es isch schöööööööhhh gsi“. De Gregor meint: „Lieber kein Stei uf de Chopf, als am Sunntig en Zopf“. De Fabian, Bruno und Jeremias hend en Stei an Chopf kriagt. Di ander Gruppe isch uf de Torre dal Päl. Si hend dött ebefalls 10 guati Seillängene gmacht. Am Morgeh hend si sich im Grotchlettere güebt und am Nomitag denn im Plattechlättere und Bade. De Marc hett sich noh im Packe vertue und hett sini Chletterfinke vergesse. Zum Glück hett er si am Nomitag chönne id Hütte gho hole. Au ih de Hütte hetts wieder en guete Znacht geh. Als Vorspiis: Chrüttercrême-Suppe mit Salot. Als Hauptgang: Spaghetti Bolognese. Als Dessert: Banane-Schoggi-Muffins. 

Mittwoch

Hüt hemmer chönna usschlofa. Das heisst bis am 7.00 Uhr. Hüt hett sichs JO und KiBe trennt. D JO isch am Bio Pfeiler gho Mehrseillängene chlettere. D Routene dött sind eher schwer gsi und vu Bohrhöge hett mer meist nur am Stand öppis gseh. Jedoch sind d Routene lohnenswert gsi, aber gern emol eifacher beschriebe als sie sind. S KiBe isch an Torre dal Päl gho chlettere. Dött sind si au chli ufeme Groot am umetanze gsi. Bi ineh hett d Routebeschribig passt. D’Sarah hetts sogar eh 6b ufehgschafft! Aber au bi ineh sind d Routene verzückend gsi. Wo mier denn zrugg cho sind, isch di gsamt Familie Bollhalder ih de Hütte gsi. Vorem Znacht isch denn noh es Gwitter cho. Apropos Znacht, au de hetts hüt wieder geh. Als Vorspiis: Rüeblisuppe. Als Hauptgang: Kei St. Galler Brootwürscht mitme Salotbuffet. Als Dessert: verschiedenschti Crême und Gebäck ufeme Buffet. Jo de Obet isch id Gschichtsbüecher ihgange. Eso en Gaudi hemmer nohnid gad gha. De Befehl vu de Chuchi, dass alli Schüssle leer und usgschäckt si münd, isch klar und düttlich ahcho... 

Donnerstag 

Hüt hend mier üs in vier Gruppe ufteilt. Ei Gruppe isch ad Seeplatte. Dött isch mit: Mischa, Joel, Silas, Mara und Fabian. Am Morge sind si dött am Mehrseillängene chlettere gsi. Am Nomitag sind si denn eh chli fuhl ih de Hütte umehghockt. Di Zweit Gruppe isch wieder an Torre dal Päl. Si isch bestande usem Samuel, Gian-Luca, Karja, Bruno, Levin, Tanisha, Manuel und Fabian. Dasmol hend si de ganz Groot chönna mache. Es isch eh ganz schöni Grootchletterei gsi. Die zweit Seillängi isch eh chli graasig gsi, Am Nomitag sind sie denn noh chli gho Bade. Die dritt Gruppe isch mol wieder am Piz Balzet – Südgroot. Dött isch ahwesend gsi: Marc, Livia, Sara, Anita, Louis, Jonas, Fabian und Lukas. Es segi sagehaft gsi. Und denn noh die viert Gruppe: Gregor, Roger und Jeremias. Sie sind uf de Piz Fraciccio. Sii hend dött eh eher schweri Route kletteret. Aber wie de Leiter vu dere Gruppe gseit hett: „Isches en Alpeporno gsi.“ Nachdem sie abgseilet hend, und eh Schneefeld duurquert hend, sind si noh uf di bekannt Fiamma. Aber au s Chuchi Team hetts geh. Als Vorspiis: Tomatesuppe mit Salot. Als Hauptgang: Polenta mit Rindsvoresse (Ragout). Als Dessert: eh excellenti Zitronecrême.  

Freitag 

Au hüt hend mier üs wiederemol in zwei Gruppe ufteilt. Ei Gruppe isch wiederemol ad Seeplatte gho chlettere. Dött hend si emol glueget was sii hend chönne chlettere. Di andere hend sich vom Staudamm abgseilt. Wos den Mittag worde isch, hend mier üs alli uf de Heiweg gmacht. 

Danke vielmol ah alli Leiter wo es super Programm zemmegstellt hend. Aber au am Jeremias en herzliche Dank, dass er immer fliessig üses Tagebuech gfüehrt hett.“ 

- unbekannt

Tags:
Website by 100pro.ch