JO Pfingstlager

14.Juni.2017 22:49:00

 JO Pfingstlager 2017 (3. bis 5. Juni 2017)

Mit de ganze Gugelfuär simmer am Samstigmorge früe, bevor die letschte Vögel wach gsi sind, richtig Schwarzwald gchroche. Dassmer denn am Obed au weiss, wommer öbe pfuse dönd, hemmer üsers Nomadedörfli gad mol ufgstellt. Vo döt us hemmer üs denn im wiite, grosse, schwarze Wald ufd Suechi noch schönstem Felse gmacht. Noch änärä chlinä Schatzsuechi hemmer denn üseri, me chönt meine vergoldete, Granitmöcke gfonde, sogär prunktvoll bestückt met Mehrseillängenäroute!

S händs glaub all rächt gnosse, werdermol veruss richtige Fels chöne z`gspüre, bises denn so richtig go sträzä cho isch und de Petrus gad emol sini ganzi Blosä glärt het. Agfühlt het sichs, als öb die Blose öber 1`000 Liter fasst. D Hauptsach alles isch nass gsi. Aber zum Glück hemmer üsers Dörfli scho ufgstellt gha. Döt hemmer denn s Obdach gsuecht und denkt, me chönt jo denn ächli ziitli afange choche ufem Füür, bekanntlich brucht jo en guildemässige 5 Gänger echli Vorbereitigsziit. Nu leider hemmer festgstellt, dassmer do gär nöd tör füre und da wör de Moment heisse, es git nöd we planet Znacht. Irgendwenn hemmer denn doch no gässe wed Fürste. Nochärä rägnerische Nacht isches au am nöchste Tag no eher osecher gsi, so isch dä Morge gmüetlich verbi gangä. Am Nomittag hemmer denn glich no chli trochne Fels gfonde, so dassmer de Tag no met Chlättere händ chöne abronde.

Am Obed isch denn aber no nüt mit Fulänzä gsi, es hät en hertä JO-Wettkampf ge. Noch flügendä Chleider, nassä Fätze, badendä Öpfel, Seil met Chnöpf und no vielem me, hend sich denn die sibirische Wüeschterennkamel eidütig döregsetzt.

Dassmer gstärcht sind fö de letschti Tag, het üs üsere Obernomad am Morge früe met zwo huusgmachte, suuperfeine Desserts gstärcht.

Do de Petrus leider allnochli anere Blosentzündig glitte het, hemmer üs in Wald verchroche bimne Lagerfüür, bevors denn weder met em Büssli richtig heiwärts gange isch, met meistens fast allne Lüt din, wo din hetet möse si…J

Danke am Obernomad fös Organisiere!


(Bericht von Marlen Bleiker)

Tags:
Website by 100pro.ch