Canyoning Tessin

11.September.2016 20:39:00

JO Cannyoning im Tessin

10. – 11. September 2016

Am Samschtig, 10. September hed sich d`JO Toggenburg z Buchs am Bahnhof troffa.

Am Start sind d`Sereina, d`Katja, d`Flavia, dr Donat, Marco, Christof, Gido, Dominik, Erik, Robin, Steffan und i, dr Jeremias gsi.

Vo Buchs simmer mit äm Auto denn is Tessin is Valle Grande gfahra.

Döt acho, hen mir üseri Usrüschtig entgega gno. Nocher simmer ä halbs Stündli ufwerts gloffa. Bi de Schlucht acho, hen mir a Iwisig übercho: Bim Sprung äsoa, bim Rutscha das nid und bim Abseila uf das luaga. Jawol, alles kapiart und los simmer.

Jo und d Schlucht beschribi ämol nid. Wils äsoa genial gsi isch. S würdi choga lang gu mit lesa, aber a par Höhepünkt ligid dri. Ei Abseilschtell isch ötscha 12m hoach gsi und inemena Wasserfall durab ganga. Was o a schöani Stell gsi isch, isch dia Stell wo ma hend chöna vo anara 11 Metriga hoacha Brugg ai jugge. Für dia Muatiga, wo no alli Tassa im Schrank ka hen, hetts o a weniger hoachi  Warianta gi, wo villicht 8 Meter hoach gsi isch. Aber ich ha halt nid alli Tasse im Schrank, drum bi i vo de Brugg gjugt. Hed no recht Überwindig brucht, bim zweita Mol fascht mea als bim erschta Mol. Leider hed mit dera Brugg d`Schlucht und dodermit der Spass fürs erschti gendet.

Den simmer zum Zeltplatz und hen üs igrichtet. Di meischa hend kei Zelt ufgstellt. Nochem Znacht simmern no ä chli ghögglet und den ohni Zwang is Bett. Pech für dia, wo kei Zelt ufgschtelt hen isch gsi, dass es i de Nacht afanga regna hett. Janu mir sind den is Esszelt glega. Dr`Marco underen Tisch, dr`Steffan, dr`Donat und ich zwüsched Bängg und dä Gido hed gad bi de Bar gschlofa.

Am nöchschta Morga hemmer alles pakt und den ab i di nöchscht Schlucht. Di Schlucht isch so abnormal genial gsi, dass ich nid weiss, was drzua schriba. Aber sEnde isch legendär gsi. Drü Absätz mit Rutscha, Springa, Abseila und alles was me no so wot. Und bi enera andera Stell hend ma sich i so a ranza-diggs Loch abgseilt.

Den simmer wider hei.

Vu mir us chönti me das all Johr macha. Will wega derga Sacha wird ma glücklich. Das Weekend wird i nid vergessa.

 

Bericht: Jeremias Eggenberger 

Tags:
Website by 100pro.ch